На выходных дэмакратычная грамадзкасьць Магілёва адзначыла 430-годзьдзе наданьня гораду Магдэбурскага права.

У памяшканьні „Кола сяброў” адбылася сьвяточная вечарына, арганізаваная Таварыствам беларускай мовы імя Францыска Скарыны (ТБМ). У якасьці вядучага імпрэзы выступіў старшыня гарадзкой арганізацыі ТБМ Алег Дзьячкоў.

Гіторыкі Ігар Пушкін і Аляксандар Агееў распавялі прысутным пра асаблівасьці магрдэбурскага права ў Магілёве, акалічнасьці атрыманьня і пашырэньня яго ў горадзе. Трэба аддаць належнае выступоўцам — іхныя прамовы не нагадвалі нудныя лекцыі, слухаліся весела і цікава.

Потым сьпавалі барды Ігар Мухін і Васіль Аўраменка, чытала нямодныя вершы па-беларуску Тацьцяна Барысік і модныя апавяданьні на трасянцы Анка Упала. Экспрэсіўна выступіла з паэмай „Курган” Янкі Купалы былая акторка і выкладчыца Вучэльні культуры Ліля Кузьменка. Закрываў вечарыну выкладчык матэматыкі коласаўскага ліцэю Міхась Булавацкі. Ён выклікаў шчырыя аплядысмэнты прысутных уласным перакладам на беларускую мову верша Аляксандра Баля.

Магдэбурскае права надалі Магілёву ў 1577 годзе. Гэта дазволіла стварыць выбарныя ворганы самакіраваньня і гарадзкі суд — магістрат. Па прывілеях, якія атрымаў Магілёў, ён саступаў толькі сталіцы Вялікага Княства Літоўскага — Вільні. Магдэбурскае права ў горадзе ліквідавалі пасьля першага падзелу Рэчы Паспалітай і акупацыі ўсходняй Беларусі Расеяй.

Ян Маўзэр, Радыё Рацыя