Магілёў мае новы, гэтым разам беларускамоўны, сайт — набраўшы ў браўзэры адрас www.mahilou.org, трапім на старонку мясцовай суполкі Таварыства беларускай мовы (ТБМ) імя Ф. Скарыны.

Цікавай выглядае гісторыя яе стварэньня. Па словах кіраўніка гарадзкой арганізацыі ТБМ Алега Дзьячкова, за апошні год у таварыства ўступілі з паўсотні новых сябраў, якіх ён нават ня бачыў на ўласныя вочы. Калі вырашыў пазнаёміцца з кожным асабіста, то патрапіў на трох студэнтаў Беларуска-расейскага ўнівэрсытэту. Вось гэтыя маладыя хлопцы і прапанавалі свае паслугі ў стварэньні электроннай візыткі.

На ўвасабленьне ідэі ў жыцьцё спатрэбіўся ўсяго месяц. Цяпер частка сайту працуе ў тэкставым рэжыме. А ў плянах — стварэньне архіву, базы фотаздымкаў ды электроннай бібліятэкі, што будзе складацца з самых рэдкіх кніжак.

Моладзь зь нецярплівасьцю чакае запуску літаратурнай старонкі, дзе будуць разьмяшчацца творы маладых магілёўскіх паэтаў.

Радыё Рацыя