Старшыня Таварыства беларускай мовы (ТБМ) Алег Трусаў 21 лютага — у Міжнародны дзень роднай мовы — заклікаў грамадзянаў Беларусі прыкласьці намаганьні, каб 2007 год афіцыйна стаў Годам беларускай мовы.

Трусаў сказаў, што ў сувязі са 125-годзьдзем з дня нараджэньня клясыкаў беларускай літаратуры, Янкі Купалы і Якуба Коласа, ТБМ аб’явіла збор подпісаў аб аб’яўленьні 2007 году Годам беларускай мовы.

— З гэтай прапановай да кіраўніка дзяржавы зьвярнуліся ўжо дзясяткі тысячаў жыхароў Беларусі, — сказаў Трусаў. — Толькі тады, калі жыхары Беларусі пачнуць размаўляць з чыноўнікамі ўсіх узроўняў па-беларуску, у лепшы бок зьменіцца пазыцыя ўладаў у дачыненьні да роднай мовы.

Трусаў сказаў таксама, што ў шмат якіх месцах Беларусі пройдуць акцыі прысьвечаныя Дню роднай мовы, адзначаючы і той факт, што ўпершыню беларускія ўлады мала таго, што не перашкаджаюць у правядзеньні акцыяў, але і самі выступаюць ініцыятарамі іх.

Радыё Рацыя