Міністэрства адукацыі Беларусі рэкамендавала ўсім ВНУ краіны пры пераходзе на новы адукацыйны стандарт арганізаваць выкладанне абавязковага курса прафесійнай лексікі беларускай мовы.

Пра гэта гаворыцца ў лісце, якое атрымала з міністэрства Таварыства беларускай мовы па выніках разгляду чарговага звароту арганізацыі ў адміністрацыю прэзідэнта. Кіраўніцтва ТБМ падмацавала свой ліст некалькімі тысячам подпісаў грамадзян, інфармуе БелаПАН.

Нагадаем, выкладанне абавязковага курса прафесійнай лексікі беларускай мовы збіраліся прыбраць з ВНУ. У яго абарону друкаваліся лісты нават у дзяржаўнай прэсе.

ТБМ у сваім звароце ў адміністрацыю прэзідэнта тлумачыў, што большасць беларусаў навучаюцца на рускай мове і не ведаюць спецыяльнай беларускамоўнай тэрміналогіі па шэрагу дысцыплін, у тым ліку па фізіцы, матэматыцы і біялогіі.

У выніку, айчынныя спецыялісты пасля заканчэння ВНУ не валодаюць прафесійнай лексікай у сваіх сферах. І толькі курс прафесійнай лексікі беларускай мовы дапамагае ім выправіць гэты недахоп.

www.belradio.fm


Гл. таксама:

За курс беларускай мовы ў ВНУ (аркуш для подпісаў)

Заява Сакратарыята ТБМ