9-11 траўня Магілёўская суполка ТБМ зладзіла вандроўку на паўночны захад краіны. У часе вандроўкі яе ўдзельнікі наведалі больш за 20 мясцінаў у Гарадзенскай (Астравецкі, Смаргонскі і Ашмянскі раёны), Віцебскай (Браслаўскі, Мёрскі, Шаркаўшчынскі, Глыбоцкі і Пастаўскі раёны) і Менскай (Мядзельскі) абласцях. 
У першы дзень вандроўнікі (45 чалавек рознага ўзросту і прафесій, аб’яднаных любоўю да беларушчыны) наведалі поўнач Гарадзенскай вобласці: замкі ў Крэве і Гальшанах, касцёлы ў Барунах, Гальшанах, Жупранах, Смаргоні, Солы і Гервятах. Не засталіся па-за ўвагай і магіла Ф. Багушэвіча ў Жупранах, а таксама Кушляны – радзіма Мацея Бурачка.
На наступны дзень адбыўся пераезд на Віцебшчыну, дзе ўдзельнікі вандроўкі наведалі касцёл і магілу Т. Ваўжэцкага ў Відзах, Замкавую гару ў Браславе, сядзібу Плятэраў у Опсе, касцёлы ў Іказні, Мёрах і Лужках, а таксама музей Язэпа Драздовіча ў Германавічах.
Пераначаваўшы ў гасціннага ксяндза Ю. Булькі ў Мосары, падарожнікі наведалі батлейку ў в. Удзела, касцёлы ў Глыбокім, Дунілавічах, Лучаі, Паставах. Пабачылі таксама калону ў гонар канстытуцыі 3 Мая ў Глыбокім і палац Тызенгаўзаў у Паставах. Напрыканцы вандроўнікі наведалі Нарач.
Трэба адзначыць, што кожны з удзельнікаў вандроўкі атрымаў адмысловы буклет з указаннем маршруту падарожжа і фотаздымкамі запланаваных да наведвання мясцін. Дарэчы, большасць вандроўнікаў падрыхтавала даклады пра той ці іншы пункт падарожжа, атрымаўшы магчымасць пабыць у ролі экскурсавода. Па выніках вандроўкі запланавана зрабіць вялікі каляровы буклет з выкарыстаннем фотаздымкаў, зробленых удзельнікамі вандроўкі.
Улетку Магілёўская суполка ТБМ плануе
яшчэ дзве вандроўкі: па Захадзе Беларусі і па Палессі. Далучайцеся!
Юрась КаласоўскіНа фота: руіны Крэўскага замку й ранак у Мосары
Гл. таксама:Гальшаны. Фотарэпартаж з вандроўкі (ч. 2) Крэва, Баруны. Фотарэпартаж з вандроўкі (ч. 1)Вандроўка на паўночны захад Беларусі (маршрут, фота) 
