Прэзентацыя незвычайнай кнігі “Успаміны ваяводы, або Пялёсткі белай ружы” адбылася ў Магілёўскім універсітэце. Чым яна незвычайная? Гэта не чарговы універсітэцкі метадычны дапаможнік або зборнік навуковых артыкулаў, а сапраўдны мастацкі твор. Аўтар кнігі, Віталь Еўмянькоў, звяртаецца ў ёй да рэдкага і забытага ў беларускай літаратуры жанру – шляхецкай гавэнды.

У кнізе адлюстраваныя падзеі ХVІІІ стагоддзя, што адбыліся на тэрыторыі Наваградскага ваяводства перад першым падзелам Рэчы Паспалітай. “Успаміны ваяводы, або Пялёсткі белай ружы” ўтрымліваюць літаратурную містыфікацыю. Кніга мае ўяўнага аўтара – шляхціча Тадэвуша Княтынскага, рукапіс якога нібыта знайшоў сучасны аўтар.

Чытач: “Гэта нешта зусім новае, якое вяртаецца да старога. Адчуваецца занурэнне менавіта ў гісторыю. Ты адчуваеш сябе ейнай часцінкай”.

У аснову твору лягла паэма Адама Міцкевіча “Пан Тадэвуш”. Таксама тут ёсць вершы Тараса Шаўчэнкі, Янкі Купалы, Чэслава Мілаша, Віславы Шымборскай.

Віталь Еўмянькоў: “Гэта такая эклектыка. Шляхецкая гавэнда як загінулы жанр на тэрыторыі нашай краіны”.

Віталь Еўмянькоў асэнсоўвае шляхецкую гісторыю Беларусі, пераносіць чытача ў эпоху рыцараў-сарматаў, што жылі ды паміралі ў імя Айчыны, Веры ды Кахання.

Чытачка: “Мне як чытачу гэтая кніга вельмі спадабалася”.

Аўтар працаваў над кнігаю 9 гадоў. Яна выйшла накладам усяго 150 асобнікаў. Распаўсюдзіць кнігу праз крамы Віталю Еўмянькову не ўдалося. Але ён спадзяецца, што твор паспрыяе адраджэнню любові да мовы, да ўласнай гісторыі.

Віталь Еўмянькоў: “Як кажуць, маленькая кропелька вады точыць камень. Гэта якраз тое спадзяванне, якое я хачу выказаць”.

Ці стануцца “Успаміны ваяводы...” літаратурным рарытэтам? Чакаем на ацэнку крытыкаў.

www.belsat.eu, фота 222.by