У нядзелю, 18 студзеня, на сядзібе ТБМ імя Францішка Скарыны адбылася сустрэча з сынам Якуба Коласа Міхасём Міцкевічам. На працягу вечарыны, якая працягвалася амаль тры гадзіны, спадар Міхась распавядаў прысутным пра сябе, пра бацьку, чытаў урыўкі з твораў Якуба Коласа, выказваў свае погляды на сучаснае жыццё Беларусі… Дарэчы, госцем сустрэчы была і Марыя Міхалаўна, дачка Міхася Канстанцінавіча.

Так, Міхась Міцкевіч распавёў пра ўзаемадносіны Якуба Коласа і Янкі Купалы, пра тое, якім ён памятае Івана Дамінікавіча. Расказаў сп. Міхась і пра абставіны смерці абодвух класікаў.


Дачка Міхася Міцкевіча сп. Марыя

Так, паводле яго, прычынай смерці Янкі Купалы стаў, хутчэй за ўсё, няшчасны выпадак. Справа ў тым, што Купала ў апошнія гады жыцця любіў выпіць. Якуб Колас нават напісаў эпіграму пра гэта. Выпіўшы ж хоць крыху, Іван Дамінікавіч ужо губляў каардынацыю… Што спажываў Купала ў дзень смерці — невядома. Хутчэй за ўсё, ён проста аступіўся.

А вось Якуб Колас у апошні дзень жыцця, 13 жніўня, занёс у ЦК партыі пісьмо пра гаротны стан беларускай мовы, пра тое, што трэба нацыянальнай мове надаць больш шырокае ўжыванне. Але яго не прынялі. Вярнуўшыся дадому, Якуб Колас пайшоў у свой кабінет… Народны паэт Беларусі памёр, седзячы ў сваім крэсле. Цяпер спадар Міхась працуе над успамінамі пра бацьку, якія друкуюцца ў часопісе “Дзеяслоў”.


Міхась Міцкевіч чытае вершы бацькі

Гаворачы пра сучасную Беларусь, Міхась Міцкевіч зазначыў, што людзі, якія губляюць сваю мову, проста ператвараюцца ў гістарычнае смецце. Народ знікае, калі губляецца мова. Сённяшняе ж беларускае грамадства, на яго думку, вельмі апалітычнае і абыякавае да свайго лёсу. Прычына – у няведанні ўласнай гісторыі, у адсутнасці нацыянальнай самасвядомасці.
Напрыканцы вечарыны старшыня Магілёўскага ТБМ Алег Дзьячкоў прэзентаваў Міхасю Міцкевічу календары “Магілёў можа стаць горадам-музеем”, “Магілёўшчына: гонар і боль”, “Магілёўшчына: яны ўславілі наш край” і “90 год БССР”.

Юрась Каласоўскі, Магілёў


Гл. таксама:

Адбылася першая сёлета вандроўка Магілёўскага ТБМ (фота, відэа)