На гэтым месцы стаяла некалі Дубравенская брама. Яе пабудавалі ў XVII стагоддзі для абароны гораду. Сёння браму можна пабачыць толькі на карцінах мастакоў. Аднак пад зямлёю, паводле мясцовых краязнаўцаў, усё яшчэ можна знайсці яе фундамент.

БАЗЫЛЬ КАМАРОЎ, МАСТАК:

«Яна была ўнізе. Тут былі валы. Вось іх яшчэ можна ўбачыць. Тут стаяла вежа. Трэба гэта ўсё адкапаць і паказаць людзям тое месца, дзе яна стаяла».


Уваход у горад на карціне Базыля Камарова. Фота mycity.by


Пакуль гэта немагчыма. Гарадскія ўлады праводзяць добраўпарадкаванне вакол гістарычнага месца. Узгорак, на якім стаяла брама, неўзабаве зальюць бетонам ды абкладуць брукам.

ДЗЯНІС, ПРАЦАЎНІК БУДОВЫ:

«Тут будуць аглядальныя пляцоўкі, а таксама лаўкі, каб людзі маглі сядзець і аглядаць нашае маляўнічае наваколле».

Месца, дзе стаяла старажытная брама, а таксама завулак Брамны, які знаходзіцца побач, гісторыкі лічаць помнікамі даўніны.


Раней тут быў уваход у горад. Фота mycity.by


ІГАР ПУШКІН, ГІСТОРЫК:

«Мы маем унікальную магчымасць даць новае жыццё Брамнаму завулку. Тым больш, што там ужо вядуцца працы па добраўпарадкаванні тэрыторыі. Трэба таксама аднавіць Дубравенскую браму».

Аднак гарадскія ўлады з-за адсутнасці сродкаў на рэканструкцыю не збіраюцца аднаўляць старажытнай брамы. На думку чыноўнікаў, будзе лепш, калі руіны застануцца пад зямлёю.

ТАЦЦЯНА РУКАЧОВА, АДДЗЕЛ КУЛЬТУРЫ ГАРВЫКАНКАМУ:

«А што ж нам, зняць культурны слой і агаліць руіны ці рэшткі таго, што там засталося? Адно з правілаў археалогіі – не пашкодзіць! Можа, варта на тым месцы паставіць камень з надпісам, што тут была брама, каб не адкрываць і не дазволіць, каб уплыў паветра прывёў да знішчэння?»

Таму жыхары Магілёва не пабачаць пакуль руінаў Дубравенскай брамы. Канструкцыі з бетону і бруку надзейна і надоўга схаваюць рэшткі гістарычнага аб’екту.

Белсат