Старшыня Магiлёўскага аблвыканкама Пётр Руднiк на прэс-канферэнцыi падвёў вынiкi першага года працы на пасадзе i паставiў задачы на 2010 год.

У 2010 годзе ў Магiлёўскай вобласцi будзе рэалiзоўвацца комплекс мерапрыемстваў, накiраваных на прапаганду беларускай мовы.

— Мы з вамi — беларусы, хоць у нас прыняты дзве мовы — беларуская i руская, — патлумачыў iнiцыятыву магiлёўскiх уладаў Пётр Руднiк.

Ён падкрэслiў, што сам заканчваў беларускамоўную школу, але пры паступленнi ў тэхнiкум давялося пераходзiць з беларускай на рускую, што было даволi цяжка.


Пётр Руднiк

Цяпер на адрас уладаў паступiлi звароты, каб у Магiлёўскай вобласцi паскоранымi тэмпамi пашыралася ўжыванне беларускай мовы. "Я не супраць," — адказаў Пётр Руднiк.

Мерапрыемствы падрыхтаваны i нават узгоднены з Адмiнiстрацыяй Прэзiдэнта. Цяпер па гэтым дакуменце пачынаецца праца.

— У гэтым правiльным кiрунку мы рухаемся, — сказаў старшыня Магiлёўскага аблвыканкама. — Я мяркую, што мы дажывём да таго, што ўсе будзем размаўляць на беларускай мове.

Паводле zviazda.by


Гл. таксама:

У Магілёве навіны па-беларуску
У Магiлёве iнiцыююць Год роднай мовы