Па-беларуску старшыня аблвыканкаму Пётар Руднік павіншаваў групу юнакоў, якім уручыў пашпарты грамадзян Беларусі.

Афіцыйныя крыніцы акцэнтуюць увагу на тым, што ў сваім звароце да моладзі Руднік згадваў толькі гадавіну перамогі ў Другой сусьветнай вайне.

“У гады Вялікай Айчыннай вайны, у барацьбе з фашысцкім ярмом загінуў кожны трэці наш суайчыньнік, таму вы павінны быць годнымі іх памяці. Быць сапраўднымі патрыётамі сваёй краіны. Праз усё жыцьцё нясіце любоў да Айчыны й роднай зямлі”, цытуюць Пятра Рудніка афіцыйныя крыніцы.


Пётар Руднік. Фота з афіцыйнага сайта аблвыканкама

Пётар Руднік ня часта прамаўляе па-беларуску. Апошні раз ад яго беларускія словы гучалі на тэлебачаньні летась у жніўні. Знаходзячыся ў Маскве, ён заклікаў яе жыхароў наведаць Магілёўшчыну словамі “запрашаем” і “калі ласка”.

Тады ж, у жніўні, афіцыйныя крыніцы распаўсюдзілі інфармацыю, што старшыня аблвыканкаму загадаў распрацаваць плян мерапрыемстваў па вяртаньні беларускай мовы ў публічнае жыцьцё. 31 сьнежня “Комплекс першачарговых мер аблвыканкаму па папулярызацыі беларускай мовы на 2010-12 гады” быў падпісаны Руднікам.

Радыё Свабода


Гл. таксама:

На Магілёўшчыне да 2012 году папулярызуюць беларускую мову
Кіраўнік Магілёўшчыны: "Мы дажывём да таго, што ўсе будзем размаўляць на беларускай мове"
У Магілёве навіны па-беларуску
У Магiлёве iнiцыююць Год роднай мовы