“Адам Кіркор і этнаграфія беларускага Палесся”- тэма чарговых заняткаў гуртка беларускай мовы ў сераду, 19 траўня. Гэтым разам мы пазнаёмімся з дзейнасцю яшчэ аднаго слаўнага сына Магілёўшчыны – гісторыка, этнографа, публіцыста, выдаўца, аўтара шматлікіх прац па гісторыі і жыцці беларускага краю.

Тэму мінулых заняткаў “Гісторыя Магілёўскага замка” прыйшлося адмяніць. Размова сама сабою перанеслася на тэму вайны і Перамогі. Удзельнікі гуртка распавялі, якім чынам вайна закранула іх сям’ю: пра бацьку, які быў у нямецкім палоне ад пачатку вайны і выжыў праз страшэнныя пакуты; пра дзядзьку, што жыве з куляй у назе; пра раненага салдата, якога бабуля хавала ў сене, рызыкуючы жыццём дзесяці дзяцей; пра карову, якая плакала на каленях, каб яе не забівалі; пра бацькоў, што сустрэліся і пакахалі адзін аднаго падчас вайны; пра “добрых” немцаў і бандытаў – партызан; і шмат яшчэ такога, што сведчыла пра вайну без патэтыкі і ідэалагічнай афарбоўкі.

Вось такое гэта балючае свята – Перамога.