Ніна Шыдлоўская, Андрэй Эзерын, Алена Макоўская, Сяргей Скараход

Семінар-прэзентацыя праходзіў у разняволенай, амаль хатняй атмасферы. З цікавасцю праслухаўшы прэзентацыю фестывалю ад Сяргея Скарахода, публіка перайшла да дакладу Андрэя Эзерына. Абмеркаванне сацыяльных сетак у жыцці і бізнэсе стала адной з самых гарачых тэм. Вы не ведаеце падрабязнасцяў прыватнага жыцця Цукерберга ці як паспяхова рэкламаваць продаж дзвярэй у “Аднакласніках”? Прыходзьце на нашы рэгіянальныя семінары, там можна даведацца!

Кава-брэйк дазволіў выступоўцам і гасцям зблізіцца і больш падрабязна абмеркаваць узнятыя ў дакладах тэмы, а таксама пагутарыць з журналістамі, якіх гэтым разам было нямала. Выступоўцы адказалі на пытанні мясцовай прэсы, падзячылі партнёрам фестывалю (у Магілёве – кампанія “Прыгожыя рашэнні”, галоўны партнёр – “Атлант-М Вест” ) і запрасілі ўсіх перайсці да другой паловы.


Сяргей Дымкоў - кіраўнік кампаніі "Прыгожыя рашэнні", сябар Магілёўскага ТБМ

А перайсці было да чаго. Традыцыйны хіт-парад найлепшых сусветных відэаролікаў ад Сяргея Скарахода і Надзеі Мурашкі (www.marketing.by) прадэманстраваў, дзе, як і наколькі смешна, якасна і з цікавай сюжэтнай лініяй робяць сучасную рэкламу ва ўсім свеце. Пасля ўроку рэкламнай геаграфіі можна было смела вяртацца на Радзіму – да прэзентацыі кампаніі “Будзьма беларусамі”, якую пакідалі, як кажуць, “на салодкае”.

Ніна Шыдлоўская і Алена Макоўская расказалі пра “Будзьма беларусамі!” і пра тое, як кампанія прайшла трохгадовы шлях ад грамадскай ініцыятывы да пазнавальнага культурніцкага брэнда з дапамогай самых сучасных дасягненняў рэкламістыкі. Апошнім пытаннем вечара стала пытанне пра тэрмін стварэння аднайменнага анімацыйнага фільма кампаніі. 8 месяцаў, адказалі выступоўцы, але гэта без “НДС” (ідэй і канцэпцыі), з імі – увесь год. Пасля чаго яшчэ раз, на біс, гэты ж мульт і паглядзелі ды перайшлі да неафіцыйнай часткі з келіхам шампанскага і развагамі пра заходне- і ўсходнебеларускую рэкламістыку.

Паводле budzma.org