Навагоднія цацкі 1930-60-х гадоў можна пабачыць на выставе «Стары Новы год», якая будзе праходзіць у Музеі гісторыі Магілёва з 10 снежня. Шчыра запрашаем!



«У Ратушы будуць прадстаўлены экспанаты, аб’яднаныя агульнай тэмай — традыцыяй святкавання Новага года ў мінулым, — тлумачаць спецыялісты аддзела культуры гарвыканкама. — Елачныя цацкі, навагоднія паштоўкі і канверты адновяць эпізоды з жыцця нашых дзядуль і бабуль, бацькоў і маці. Дарэчы, на выставе будуць прадстаўлены як цацкі масавай прамысловай вытворчасці, так і самаробныя ўпрагожванні».

Па словах дырэктара музея Аляксея Бацюкова, на першым паверсе Ратушы ўсталююць елку, якая будзе ўбрана рарытэтнымі цацкамі. Менавіта з яе і пачнецца знаёмства магілёўцаў з выставай «Стары Новы год». Акрамя таго, наведвальнікі ўбачаць святочныя паштоўкі і канверты, фотаздымкі мінулых гадоў. Экспазіцыю дапоўняць карціны магілёўскіх мастакоў на зімовую тэматыку. Пераважная большасць прадстаўленых экспанатаў належыць фондам Музей гісторыі Магілёва. Выстава будзе працаваць да Старога Новага года — 13 студзеня 2012 г.

Паводле mycity.by