З 9 снежня на працягу тыдня ў магілёўскіх тралейбусах гучалі песні на словы выдатнейшага беларускага паэта Максіма Багдановіча. Акцыя, ініцыятарам якой стала Магілёўскае ТБМ, была прымеркавана да 120-годдзя з дня народзінаў класіка беларускай літаратуры.



Магілёўцам і гасцям горада было прапанавана 5 песень. Сярод іх «Зорка Венера», «Па-над белым пухам вішняў» і «Слуцкія ткачыхі».

Як заўважыў кіраўнік службы руху «Гарэлектратранспарту» Аляксандр Кузін, мэта гэтай акцыі фармулюецца дастаткова проста: папулярызацыя як беларускай мовы, так і творчасці аднаго з выдатнейшых паэтаў нашай краіны. А. Кузін пералічыў маршруты тых тралейбусаў, у салонах якіх гучалі беларускія песні. Гэта тралейбусы № 2 (6 машын), № 4 (5 машын)і № 5 (4 машыны).

Таксама старшыня Магілёўскага ТБМ Алег Дзьячкоў паведаміў пра тое, што ў хуткім часе ў Магілёве можа быць усталяваны помнік Янку Купалу. З адпаведнай прапановай магілёўцы выступілі ў час пасяджэння гарвыканкаму. Помнік аўтару «Магілы льва» плануецца ўстанавіць у парку імя Горкага.

Паводле mycity.by